Na Stephano Mango, Mbinga
MKURUGENZI Mtendaji Halmashauri ya Wilaya ya Mbinga Joseph Kashushura amewataka watoa huduma wa Kituo cha Afya Matiri kutoa huduma bora za afya huku akisisitiza kuwa ongezeko la watoa huduma kituoni hapo liendane na utolewaji wa huduma bora za afya.
 |
| Mkurugenzi wa Halmashauri ya Wilaya ya Mbinga Joseph Kashushura akizungumza na Wataalam wa Sekta ya Afya |
Hii ni baada ya Serikali kuajiri watoa huduma za afya nchini hivi karibuni na Halmashauri ya Wilaya ya Mbinga kuwa mnufaika wa ajira hizo.
Mkurugenzi Kashushura ametoa rai hiyo jana wakati akiwa katika ziara yake ya kutembelea kituo cha afya Matiri kilichopo Halmashauri ya Wilaya ya Mbinga.
" Jumla ya watumishi nane wameongezeka hapa sasa kila mmoja ana wajibu wa kuhakikisha analeta tija kwa jamiii, hakikisheni mnafanya kazi kwa weledi" Amebainisha
Kwa upande wake Katibu wa Afya Halmashauri ya Wilaya ya Mbinga George Mhina ameeleza kuwa Halmashauri ya Wilaya ya Mbinga imepokea jumla ya Watumishi 81 wa kada ya afya na Kituo cha Afya Matiri kimepokea watumishi 8.
Kwa upande wake Diwani wa Kata ya Matiri William Mbwambo amebainisha kuwa ongezeko la watoa huduma limeleta tija kwa wananchi wa Matiri ambao awali walilazimika kwenda katika vituo vya afya binafsi au vilivyopo nje ya Kata hiyo jambo ambalo liliwaongezea gharama.
Naye Mganga Mfawidhi wa Kituo Jane Zackaria ameeleza kuwa awali kituo kilihudumia wagonjwa wapatao 400 kwa mwezi lakini sasa Kituo kinahudumia wagonjwa zaidi ya 600.
